“ዳቮስ ኢን ዘ ዴዘርት” በመባል የሚታወቀውና በሚቀጥለው ሳምንት በሪያድ ሊካሄድ የነበረው አስረኛው  የኢንቨስትመንት ማነቃቂያ ዓለም አቀፍ ጉባኤ በሁቲ ታጣቂዎች ጥቃት ምክንያት ወደ ቀጣዩ ዓመት ተራዝሟል።

የጉባኤው መራዘም የዓለም መሪዎችን እና ታዋቂ የገንዘብ ተቋማትን ለመሳብ ለምታደርገው ጥረት ትልቅ እንቅፋት የሆነባት ሳዑዲ አረቢያ፥ ከጸጥታ ስጋቱ ጋር ተያይዞ በዋና ከተማዋ ሪያድ የሚገኙ የመንግሥት ድርጅቶች ሰራተኞቻቸው በቤታቸው ሆነው እንዲሰሩ ማዘዛቸውም ታውቋል።

የየመኑ የሁቲ ታጣቂዎች ባለፉት ሳምንታት በሪያድ ዓለም አቀፍ አውሮፕላን ማረፊያ ላይ ባደረሱት ተደጋጋሚ የሚሳይል ጥቃቶች የአሥራ አራት ንጹሃን ዜጎች ሕይወት ማለፉን እና ከሦስት መቶ በላይ መቁሰላቸውን የሳዑዲ ባለሥልጣናት ይፋ አድርገዋል።

በአንጻሩ በየመን የሚንቀሳቀሰው የሁቲዎች የጤና ሚኒስቴር በበኩሉ፥ ሳዑዲ መራሹ ጥምር ጦር ካለፈው መስከረም ወር ጀምሮ በየመን በሰነዘራቸው ጥቃቶች አብዛኞቹ ሴቶችና ሕፃናት የሆኑ መቶ አርባ አንድ ሰዎች መገደላቸውን በመግለጫው ጠቅሷል።

ሁለቱ ወገኖች በፈረንጆቹ 2022 የተደረሰውን የተኩስ አቁም ስምምነት በመጣስ ካለፈው ሐምሌ ጀምሮ ወደ ከባድ ውጊያ የተመለሱ ሲሆን፥ ግጭቱ በቀይ ባሕር እና በባብል መንደብ ስልታዊ የወደብ መስመሮች ላይ ከፍተኛ የደህንነት ስጋት መፍጠሩ ተረጋግጧል።